Alla Itolae Nusa 40
Kena yelu meru ono ete Yusupe takwali kuate mo, elake maka raka tamata maka aknekae yelu rebe Pirone ikinure kai elake maka raka tamata maka moa ete Pirone esi kerike sala ete Kamale Mesire mere.
Eleki Pirone inasuke eni tamata makerike lua meru.
Eleki ikerike luasi kai ikusu luasi kena bui rebe elake maka raka Pirone ikusue Yusupe kenare.
Eleki buije esi elake iulake Yusupe irue sakesa kai luasi leke Yusupe ikerike ete luasi. Luasi kusu bui ete mere takwali.
Kena petu sae me elake maka raka tamata maka aknekae yelu rebe Pirone ikinue kai elake maka raka tamata maka moa ete Pirone rebe esi kusu buije luasi kmani. Kmani meru esi natire tetebike.
Kena bobanu beleti Yusupe ikusu loko luasi iselu lua rowesi.
Eleki itneu Pirone eni makerike luaya rebe kusu bui sakesa kaini me Yusupe eni luma upuije eni lumare be,
“Le mula pine petu meije rowe imire?”
Luasi beteke loko Yusupe be,
“Mempetuke ami luama kmani po sae ibeteke esi natire ete ami luama mosa.”Eleki Yusupe ibeteke loko luasi be,
“Alla Ibeteke kmanire esi natire. Hoko luami lulu luami kmaniru ete au.”Eleki elake maka raka tamata maka aknekae yelu rebe Pirone kinue ilulu eni kmanire be,
“Au selu anggure aini ekele me oalalekue.
Anggure aini mere esi sanai telu kai ehlulu eleki esirie labui sosoli kai esi unui bokala hoko esi buai kwapela bokala.
Kena mere au kerike Pirone eni onate bei perake eleki au rana anggure bua kwapele eleki au busi esi kwele kena onate eleki au rilukele ete Pirone.”
Eleki Yusupe ibeteke lokoi be,
“Anggure sanai telu meru esi natire petua telu.
Hoko kena petua telu suike Pirone isirie ale bei buije eleki iono akerike suike kena ono elake ete tamata maka raka aknekae yelu rebe Pirone kinue lupe amu makerike akmenare neka.
Sepo asupu misete peneka me Pirone eni luma hoko anete loko au kena alenake au ete Pirone leke isirie au bei bui meije.
Le au meije tamata Ibrani po tamata esi ndeae au bei me tamata Ibraniaru esi tapele, kai esi kusue au kena bui mei Potipare eni luma meije, au ono sala sasaisa mo.”
Eleki elake maka raka tamata maka moa ete Pirone ilene be kmani mere esi natire emise titinai hoko ibeteke loko Yusupe be,
“Au kmani lekwe be au selu au reru roti sokata telu aruru lolete.
Kena sokate rebe endete babare me esi laleije kute pusue manane ooani rebe tamata maka moa ete Pirone esi moale po manua ndete tetuaru ukane pusue manane meru.”
Eleki Yusupe ibeteke be,
“Kmani mere esi natire elere: sokata telu meru esi natire petua telu.
Petua telure Pirone ibitike ale eleki ikwelie ale ndete tetu kena lili aini eleki manua ndete tetu ukane tinaimue.”
Eleki kena petu telure Pirone eni petu kena rue leije hoko Pirone iono makanele elake ete pusue eni maka kerikaru. Kena mere iulake sirie elake maka raka tamata maka aknekae yelu rebe Pirone kinue kai elake maka raka tamata maka moa ete Pirone eleki ikerisi me Pirone eni tamata maka kerikaru, oaisu.
Elake maka raka tamata maka aknekae yelu rebe Pirone kinue, Pirone ibitike suikeni kena eni makerike akmenare.
Po elake maka raka tamata maka moa ete Pirone esi kwelieni lulu Yusupe ibeteke kmanire esi natire.
Po elake maka raka tamata maka aknekae yelu rebe Pirone kinure inete loko Yusupe moneka.